Монгол Улсын орон сууцны салбарт тулгамдаж буй асуудлуудыг хэлэлцэж, олон улсын туршлага солилцох “Орон сууцны асуудал дэлхийд болон Монголд” сэдэвт уулзалтыг өнөөдөр /2026.03.24/ зохион байгууллаа. Тус уулзалтад Нэгдсэн Үндэстний Байгууллагын Суурьшлын хөтөлбөр, Хот байгуулалт, барилга, орон сууцжуулалтын яам, Монголын хотуудын холбоо ТББ, “Зөөлөн хотын шийдэл” ТББ болон Хархорум, Хүннү хотын удирдлагууд оролцож, орон сууцны салбарын өнөөгийн нөхцөл байдал, цаашдын хөгжлийн чиг хандлагын талаар санал солилцсон юм.
Уулзалтын үеэр Монгол Улсын орон сууцны салбарын хүртээмж, чанарын асуудал, санхүүжилтийн тогтолцоо, ипотекийн зээлийн боломж, ногоон орон сууцны бодлогын хэрэгжилт зэрэг өргөн хүрээний сэдвийг хөндөн ярилцав. Мөн хотжилтын хурдацтай өсөлтөөс үүдэлтэй төлөвлөлтийн сорилтууд, дэд бүтцийн ачаалал, иргэдийн амьдрах орчны чанарыг сайжруулах шаардлагыг онцлон хэлэлцсэн.
Түүнчлэн дэлхийн улс орнуудын орон сууцны бодлого, сайн туршлагууд, тогтвортой, хүртээмжтэй, иргэдэд ээлтэй хотын хөгжлийн шийдлүүдийг танилцуулж, тэдгээрийг Монгол Улсад нутагшуулах боломж, хэрэгжүүлэх арга замын талаар оролцогчид санал солилцлоо. Энэ хүрээнд төр, хувийн хэвшил, олон улсын байгууллагуудын хамтын ажиллагааг өргөжүүлэх боломжийг тодорхойлж, цаашид хэрэгжүүлэх санал, санаачилгуудыг дэвшүүлсэн юм.
Уулзалтын төгсгөлд, орон сууцны хүртээмжийг нэмэгдүүлэх, иргэдийн амьдрах орчны чанарыг сайжруулах бодит шийдлүүдийг тодорхойлох, олон улсын туршлагыг нэвтрүүлэхэд чухал ач холбогдолтой арга хэмжээ болсныг оролцогчид онцоллоо.