Сүүлийн жилүүдэд Улаанбаатар хотын хүн ам, тээврийн хэрэгслийн тоо эрчимтэй нэмэгдэж, төвийн бүсийн авто замын ачаалал хотын дэд бүтцийн хүчин чадлаас давсан нь түгжрэлийн гол шалтгаан болоод байна. Иймд замын сүлжээг өргөтгөж, хөдөлгөөний урсгалыг шинэ коридороор тараах шийдэл шаардлагатай болж, энэ хүрээнд “Шинэ тойрог зам” төслийг хэрэгжүүлэхээр төлөвлөсөн. Шинэ тойрог зам төсөл нь нийт 50 гаруй километр үргэлжлэх бөгөөд хотын захын бүсүүдийг хооронд нь холбосон тээврийн шинэ коридор бий болгож, ирэх 20 орчим жилийн хөдөлгөөний эрчмийг даах чадвартай инженерийн иж бүрэн шийдлийг бүрдүүлэхээр зорьж байна.
Төслийн хүрээнд төлөвлөсөн Хоёрдугаар тойрог зам нь 21.6 км урттай байхаар урьдчилсан зураг төслийг боловсруулаад байна. БНХАУ-ын Гуандун мужийн Зам, тээврийн төлөвлөлт, зураг төслийн хүрээлэн групп ХК төслийн техник эдийн засгийн үндэслэлийг боловсруулж байгаа бөгөөд одоогоор 95 хувийн гүйцэтгэлтэй үргэлжилж буй.
Замын трассыг сонгохдоо инженерийн шийдлээс гадна байгаль орчин, эдийн засгийн үр ашиг, хот төлөвлөлтийн урт хугацааны бодлогыг харгалзан үзсэн бөгөөд байгалийн нөөц бүс, усны эх үүсвэрийн хамгаалалтын бүс зэрэг эмзэг бүсүүдийг аль болох тойруулан төлөвлөжээ. Мөн ашиглагдахаа больсон коридор болон хог хаягдлын бүсүүдийг трасст оруулснаар газар чөлөөлөлтийн зардлыг бууруулах боломжийг тусгасан байна.
Төслийн маршрутын хувьд баруун чиглэл нь 22-ын товчооноос эхэлж Тахилт, Найрамдал, Нарангийн гудамжны төгсгөл, Улаан чулуутын хогийн цэг орчмоор дайран Баянхошууны уулзварт хүрч Нэгдүгээр тойрог замтай холбогдоно. Харин зүүн чиглэл нь Баянзүрх дүүргийн 24 дүгээр хороо буюу Сэтгэцийн эрүүл мэндийн төв орчмоос эхэлж Улиастай, Гачууртын чиглэлд үргэлжилж, Туулын хурдны замтай огтлолцохоор төлөвлөгджээ.
“Шинэ их тойруу” буюу Хоёрдугаар тойрог зам нь Улаанбаатар хотыг олон төвт бүтэцтэйгээр хөгжүүлэх, захын хорооллуудын тээврийн хүртээмжийг нэмэгдүүлэх чухал хөшүүрэг болох юм. Урьдчилсан тооцооллоор энэхүү “Шинэ тойрог зам” төсөл хэрэгжсэнээр нийслэлийн авто замын түгжрэлийг 23 орчим хувиар бууруулж, замын хөдөлгөөний дундаж хурдыг 23.3 хувиар нэмэгдүүлэх боломжтой гэж үзэж байна.