Монголын барилгын материал үйлдвэрлэгчдийн холбооноос (МБМҮХ) санаачлан “Сэлбэ 20 минутын хот” төслийн хүрээнд дотоодын үйлдвэрлэгч, нийлүүлэгчдийг дэмжих, тэднийг төслийн ерөнхий гүйцэтгэгч байгууллагуудтай холбох зорилго бүхий “Үндэсний үйлдвэрлэгчид – Хөгжлийн түншлэл” нээлттэй өдөрлөгийг зохион байгуулах гэж байна.
Уг арга хэмжээ 2026 оны дөрөвдүгээр сарын 8-ны 10:00-17:00 цагт Нийслэлийн жижиг, дунд үйлдвэрлэл, үйлчилгээг дэмжих төвийн байранд болно. Өдөрлөгийн гол зорилго нь төсөл хэрэгжүүлэгч талуудын зүгээс барилгын материал нийлүүлэлтэд тавигдах шаардлагын талаар үйлдвэрлэгчдэд нэгдсэн мэдээлэл өгөх, хамтын ажиллагааны талбарыг бий болгоход оршиж байгаа юм.
“Сэлбэ хот орон сууцжуулалт төсөл”-ийн барилгын ажил гүйцэтгэх гэрээний нөхцөлийн дагуу гүйцэтгэгч байгууллагууд нь нийт бараа, материалынхаа 35-аас доошгүй хувийг, тоног төхөөрөмжийн 40-өөс доошгүй хувийг дотоодын зах зээлээс заавал бүрдүүлэх үүрэг хүлээсэн байдаг. Мөн цемент, арматур, бетон зуурмаг, тоосго, лифт зэрэг үндсэн 13 нэр төрлийн материалыг дотоодын үйлдвэрлэгчдээс худалдан авахаар гэрээний хавсралтад тусгажээ.
Өдөрлөгийн хөтөлбөр хоёр үндсэн хэсгээс бүрдэх бөгөөд 10:00-14:00 цагийн хооронд үндэсний үйлдвэрлэгч нарт зориулсан мэдээлэл, уулзалт хийх бол 14:00 цагаас хойш хамтран ажиллах хүсэлт ирүүлсэн байгууллагуудад зориулан мэдээлэл өгөх юм.
Арга хэмжээнд оролцох сонирхолтой аж ахуйн нэгжүүд бүтээгдэхүүний техник тодорхойлолт, лабораторийн сорилтын тайлан, тохирлын гэрчилгээ зэрэг баримт бичгийн бүрдлийг хангасан байх шаардлагатайг зохион байгуулагчид сануулж байна.
Дэлгэрэнгүй мэдээллийг 99015759, 99143658, 99156327 дугаараас лавлана уу.