Нийслэлийн Сонгинохайрхан дүүргийн 5, 6, 7 дугаар хорооны нутаг дэвсгэр нь гэр хорооллын бүс ихтэй учир дэд бүтцийн хангамж сул, инженерийн шугам сүлжээ хангалтгүй байв. Тиймээс айл өрхүүдийн дийлэнх нь нүүрс, түлшээр галлаж, нүхэн жорлон ашиглаж, үүний цаана иргэдийн эрүүл мэнд, амьдрах орчинд сөргөөр нөлөөлж байна. Цаашид иргэдийн орлогын түвшинд нийцсэн орон сууцны хүртээмжийг нэмэгдүүлэх, эрүүл, аюулгүй, тав тухтай орчин бүрдүүлэх зорилгоор төслүүдийг хэрэгжүүлж буйн нэг нь “Ханын материал орчмын гэр хорооллыг орон сууцжуулах төсөл” юм. Тус төслийн эх загвар зураг батлагдаж, бүтээн байгуулалтын бэлтгэл ажлууд эхэлж, барилгын түр хашаа барих, талбайн зохион байгуулалт хийх, инженерийн шугам сүлжээний трасс тодорхойлох зэрэг ажлууд хийгдэж эхэлсэн байна. Төслийг нийт 20.7 га талбай бүхий 213 нэгж талбарт хэрэгжүүлэхээр төлөвлөснөөс өнөөдрийн байдлаар 210 нэгж талбарыг чөлөөлжээ.
“Ханын материал орчмын гэр хорооллыг орон сууцжуулах төсөл” нь төр, хувийн хэвшлийн түншлэлийн хүрээнд хэрэгжиж байгаагаараа онцлогтой. Тодруулбал, нийслэлээс дэд бүтцийн асуудлыг хариуцан, газар чөлөөлөлтийг шийдвэрлэж, “Нийслэлийн Орон сууцны корпораци” ХК нь төлөвлөлтийн ерөнхий шаардлагыг хангуулж ажиллаж байгаа бол хөрөнгө оруулагч аж ахуйн нэгж барилга угсралтын ажлыг гүйцэтгэж байна. Төслийн хэрэгжүүлэгчээр барилгын салбарт туршлагатай “Материал Импекс” ХХК шалгарч, барилга угсралтын ажлыг эхлүүлэх бэлтгэлээ хангаад байна.
Төсөл хоёр үе шаттайгаар хэрэгжих бөгөөд эхний үе шатанд 2025-2027 онд 12.6 га талбайд 1800 айлын орон сууц, хоёрдугаар үе шатанд 2027-2029 онд үлдсэн 1200 айлын орон сууцыг барьж ашиглалтад оруулахаар төлөвлөжээ.
Нийслэлийн иргэдийн Төлөөлөгчдийн Хурлын 2013 оны 7/29 дүгээр тогтоолоор тус бүсэд 130 га талбайд гэр хорооллыг орон сууцжуулах байршлыг тогтоосон ч Б2 хэсэгчилсэн талбайд хэрэгжих ёстой төсөл 10 гаруй жилийн турш зогсонги байдалд орж, иргэдийн амьдрах орчин доройтох нөхцөл үүссэн. Иймээс нийслэлийн зүгээс уг төслийг дахин төлөвлөж, хэрэгжилтийг эрчимжүүлэн бодит ажил хэрэг болгон хэрэгжүүлж эхлээд байна.
Төсөл бүрэн хэрэгжсэнээр нийслэлийн хүн амын төвлөрлийг сааруулж, 3000 айлын орон сууц шинээр баригдаж, 3000 өрхийн яндан, 3000 нүхэн жорлонг халснаар агаар, хөрс, орчны бохирдол эрс буурна.