“Улаанбаатар Трам” төсөл Зуслангийн бүсийг хотын төвтэй, хотын төвийг Яармагийг бүсүүдтэй шууд холбосноор нийслэлийн төвлөрлийг тэнцвэржүүлэх, зорчих зай, хугацааг эрс багасгах, хотын хөдөлгөөний үр ашиг, иргэдийн өдөр тутмын зорчих таатай байдлыг дээшлүүлэх чухал үүрэг гүйцэтгэх юм.
Түүнчлэн Трамвай нь троллейбустай харьцуулахад багтаамж ихтэй бөгөөд нэг удаад 250 хүртэл зорчигч тээвэрлэх боломжтой, шугам нэг нь оргил цагийн зорчигчийн эрэлт нь цагт 6509 хүн тээвэрлэх хүчин чадалтайгаас гадна замын хөдөлгөөний дундаж хурдыг 25.7 хувиар нэмэгдүүлнэ. Харин хоёрдугаар шугам нь 15 км урттай, оргил цагийн зорчигчийн эрэлт нь цагт 6989 хүн байх юм.
Одоогийн байдлаар хотын нийт гудамж, замын 78 хувьд түгжрэл үүсэж, иргэд өдөрт дунджаар 2.4 цаг, жилд 35 хоногийг замын сааталд үр ашиггүй өнгөрүүлж байна.Трамвай ашиглалтад орсноор иргэдийн зорчих хугацааг эрс хэмнэнэ. Тухайлбал, автобусаар 90-100 минут зарцуулдаг нэгдүгээр шугамын зайг 30-35 минутад, хоёрдугаар шугамын чиглэлд 40-45 минутад зарцуулах нөхцөл бүрдэнэ. Мөн өртөө орчмыг хөгжүүлэх үйл ажиллагааны нөлөөгөөр нийт 230,000-270,000 ажлын байр шинээр бий болж, өртөө орчимд жижиг, дунд бизнес эрхлэгчдийг дэмжих шууд нөлөөллийг үзүүлнэ.
Трамвай нь цахилгаан эрчим хүчээр ажилладаг бөгөөд авто замын тээвэртэй харьцуулахад хүлэмжийн хийн ялгарлыг бууруулах, агаарын чанарыг сайжруулах ач холбогдолтой. “Улаанбаатар Трам” төсөл нь манай орны нөхцөлд хамгийн оновчтой, найдвартай, үр ашигтай нийтийн тээврийн хэрэгсэлд тооцогдож байна.